УЛС ТӨР

Нүүрсээ төмөр замаар экспортлох цаг ирлээ

Гадаад харилцааны сайд БНХАУ-ын Гадаад хэргийн сайд Ван И-гийн айлчлал өндөрлөлөө.

Энэ удаагийн айлчлалаар томоохон төсөл, хөтөлбөрүүдийн хэрэгжилтийг эрчимжүүлэх, ялангуяа хилийн боомтуудын хүчин чадлыг сайжруулж, төмөр замын тээврийг нэмэгдүүлэх, “Эрдэнэбүрэнгийн усан цахилгаан станц”, “Багануурын цахилгаан станц” төслийг хэрэгжүүлэх зэрэг чиглэлээр тодорхой шийдвэрт хүрнэ гэсэн хүлээлт нийгэмд үүсээд байлаа.

            Хоёр улсын Гадаад хэргийн сайд хэлэлцээ хийсэн талаараа мэдээлэл өгснөөс үзвэл энэ удаагийн айлчлал үр дүнгээ өгчээ.  

            Тухайлбал Гашуунсухайт-Ганцмод боомтыг төмөр замаар холбох асуудлыг эцэслэн тохиролцож, БНХАУ-д урт хугацаанд нүүрсээ тогтвортой нийлүүлэх гэрээ байгуулах болж.   

            Энэ төмөр зам ашиглалтад орсноор нүүрсний экспорт жилд 15 сая тонноор    нэмэгдэх урьдчилсан тооцоо бий. Энэ бол улсын төсөв хоёр дахин өсөж, энэ хэрээр эдийн засаг тэлнэ гэсэн үг.

            Үе үеийн төр, засаг Тавантолгой-Гашуунсухайтыг төмөр замаар холбох, цаашид БНХАУ-ын Ганцмод боомттой холбохыг зорьж ирсэн нь үнэн.       

Харамсалтай нь дотоодын улс төржилт, өргөн, нарийн цариг гэсэн толхилцоон, үл ойлголцол, талцал, хуваагдлаас болж бодит үр дүнд хүрч байсангүй.

Харин энэ удаа дотроо ч, хятадын талтай ч тохиролцоонд хүрч олон жил ярьсан асуудлаа шийдвэрлэж чадлаа. 

Төр, засгийн аливаа бодлого, шийдвэрийн залгамж чанар бидэнд их дутагддаг. Бурууг нь засаж сайжруулаад үргэлжлүүлж явдаг байх ёстой.

Энэ үүднээс нь харвал У.Хүрэлсүх Ерөнхий сайд байхдаа Тавантолгой-Гашуунсухайт төмөр замын төслийг гацаанаас гаргаж, БНХАУ-д айлчлахдаа олон асуудал, үүний дотор  Гашуунсухайт боомтын үйл ажиллагааг өргөтгөх, дэд бүтцийг нь сайжруулахаар тохиролцож байлаа.  

2022 оны наймдугаар сарын 8. Гадаад харилцааны сайд Б.Батцэцэгийн урилгаар Монгол Улсад айлчилж байгаа Бүгд Найрамдах Хятад Ард улсын Төрийн зөвлөлийн гишүүн, Гадаад хэргийн сайд Ван Игийн айлчлал өнөөдөр албан уулзалтуудаар үргэлжилж байна. Айлчлалын хүрээнд өнөөдөр зарим гэрээ хэлэлцээрийг баталгаажууллаа. ГЭРЭЛ ЗУРГИЙГ Б.БЯМБА-ОЧИР/MPA

Л.Оюун-Эрдэнийн Засгийн газар Тавантолгой-Гашуунсухайт чиглэлийн 267 км, Зүүнбаян-Ханги чиглэлийн 226 км  төмөр замыг энэ намар ашиглалтад оруулж, жилд 50 сая тонн бүтээгдэхүүн нэмэлтээр экспортлохыг зорьж байна.  

Энэ оны хоёрдугаар сард хоёр улсын Засгийн газар Гашуунсухайт-Ганцмод боомтын төмөр замын хил холболтын цэгийг эцэслэн тохирсон.

Энэ хүрээнд Гашуунсухайт-Ганцмод боомтын Ачаа шилжүүлэн ачих терминал байгуулах ёстой. Энэ бүтээн байгуулалтын нээлтэд Ерөнхий сайд Л.Оюун-Эрдэнэ өнгөрсөн тавдугаар сард оролцож байлаа.  

Энэ бол улс орны хөгжлийн бодлогыг Ерөнхийлөгч, УИХ, Засгийн газар нэг цонхоор харж байгаагийн нэг илрэл гэж хэлж болох юм.

Бид хэдийгээр 10 гаруй жил алдсан ч энэ удаа урагшаа томоохон алхаж чадлаа. Тавантолгой-Гашуунсухайтын төмөр замыг 2013 онд ашиглалтад оруулж чадсан бол доод тал нь 80 их наяд төгрөгийн орлого олох боломж бидэнд байсан юм шүү. Энэ алдаагаа дахин бүү давтаасай. Сургамж болж үлдээсэй.

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet