ДЭЛХИЙН МЭДЭЭ

2015 онд Парист болсон халдлагын гол сэжигтэнд бүх насаар нь хорих ял оноолоо

Лхагва гарагт Францын шүүх 2015 онд Парис хотод халдлага үйлдсэн Исламын бүлэглэлийн цорын ганц амьд үлдсэн хүнийг терроризм, хүн амины хэрэгт буруутай гэж үзжээ.

Шүүх Салах Абдесламд 130 хүний ​​аминд хүрсэн галт зэвсэг, тэсрэх бөмбөгтэй халдлага үйлдсэнийхээ төлөө бүх насаар нь хорих ял оноосон байна.

2015 оны арваннэгдүгээр сарын 13-нд баар, ресторан, үндэсний хөл бөмбөгийн цэнгэлдэх хүрээлэн, Батаклан хөгжмийн танхимд болсон халдлагын үеэр 130 хүн амь үрэгдсэнээс гадна олон зуун хүн шархдаж байв.

Мөн шүүх хэрэгт холбоотой өөр 19 хүнд ял оноожээ. Тэдний зургааг нь нас барсан гэж таамаглаж байгаа аж.

Францын орчин үеийн түүхэн дэх хамгийн том шүүх хурал өнгөрсөн есдүгээр сард эхэлсэн бөгөөд шүүх хурлын эхэнд Абедслам бүгдийг эсэргүүцэж, өөрийгөө Исламын улс бүлэглэлийн “цэрэг” гэж тодорхойлсон байна.

Хожим нь тэрээр хохирогчдоос уучлалт гуйсан ч шүүх хуралдааныг хааж хэлсэн үгэндээ өөрийгөө “алуурчин биш” гэж хэлээд, түүнийг хүн амины хэргээр яллах нь “шударга бус явдал” болно гэж мэдэгдсэн байна.

Мөн тэрээр шүүх хурлын үеэр амиа золиослогч хантаазыг халдлага болсон шөнө дэлбэлэхгүй байхаар шийдэж, Парисын захын дүүрэгт устгасан гэж мэдүүлжээ. Шүүх амиа золиослогч хантааз гэмтэлтэй гэсэн нотлох баримтыг хүлээн авсан боловч Абдесламын сэтгэл сүүлийн мөчид өөрчлөгдсөн гэдэгт итгээгүй байна.

Абдеслам хугацаанаасаа өмнө суллагдах ямар ч боломжгүй бөгөөд түүнд оноосон ял Францад гэмт хэрэгтнүүдэд оногдуулдаг хамгийн хүнд эрүүгийн ял байна. Тус улсын шүүх өмнө нь ердөө дөрвөн удаа ийм ял оноож байжээ.

Эх сурвалж: BBC

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet