ДЭЛХИЙН МЭДЭЭ

АНУ Баграмын агаарын баазыг шөнийн цагаар мэдэгдэлгүйгээр орхижээ

Америкийн арми Афганистан дахь гол бааз болох Баграмын агаарын баазыг шөнө дунд Афганчуудад мэдэгдэлгүйгээр орхиж явсан гэж баазын шинэ командлагч мэдэгдэв. Генерал Асадулла Кохистани ВВС-д мэдээлэл өгөхдөө “АНУ-ын тал Баграмаас орон нутгийн цагаар өнгөрөгч Баасан гарагийн шөнө 03:00 цагт гарсан бөгөөд Афганистаны цэргийнхэн үүнийг хэдэн цагийн дараа олж мэдсэн” гэжээ.

Баграмын ​​ хорих ангид 5000 орчим Талибанчууд хоригдож байгаа бөгөөд Генерал Кохистани Даваа гарагт хийсэн мэдэгдэлдээ Талибанчууд Баграм руу ​​халдана хэмээн таамаглаж байгаагаа дурджээ. Тэрбээр “Бид өөрсдийгөө америкчуудтай харьцуулбал маш том ялгаа бий. Гэхдээ бид байгаа боломжийнхоо хэрээр хамгийн сайнаараа хичээж мөн аль болох аюулгүй байдлыг хангахыг хичээж байна” гэв.

Өнгөрөгч Баасан гарагт АНУ Баграм хотыг чөлөөлж, хугацаанаасаа өмнө цэргийн ажиллагаагаа амжилттайгаар дуусгаж байгаагаа мэдэгдсэн. Тус улсын Ерөнхийлөгч Жо Байден ирэх есдүгээр сарын 11-нд албан ёсоор Афганистан дахь цэргийн ажиллагаагаа дуусгана гэж зарласан юм.

Америкчууд хэдэн арван мянган савтай ус, энергийн ундаа, цэргийн хүнс, олон мянган түлхүүргүй тээврийн хэрэгсэл, хэдэн зуун хуягт машин зэрэг 3.5 сая орчим эд зүйл үлдээсэн гэж “Associated Press” мэдээлэв. Тэд хүнд зэвсгээ авч, зэр зэвсгийн нөөцийн зарим хэсгээ дэлбэлсэн боловч афганчуудад зориулан жижиг зэвсэг, хамгаалах хэрэгсэл үлдээжээ.

Эх сурвалж: https://www.bbc.com

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet