ХҮҮХЭД

Хүүхдийнхээ ухаалаг төхөөрөмжийн хэрэглээг хянах ДӨРВӨН ШАЛТГААН

Ухаалаг гар утас, таблетын хэрэглээ бидний амьдралын олон талыг илүү хялбар, тухтай, үр бүтээлтэй болгосон ч дэлгэцийн хамаарал, түүнээс үүдсэн нойргүйдэл зэрэг олон асуудлыг дагуулсан. Хүүхдүүд, ялангуяа бага насныхны хувьд ч ухаалаг төхөөрөмжийн хэрэглээ сэтгэл зүйн болоод биеийн эрүүл мэндийн олон асуудал үүсгэж болзошгүйг эмч, сэтгэл зүйч, бусад салбарын мэргэжилтнүүд анхааруулж байна. Хүүхдийнхээ цахим, ухаалаг төхөөрөмжийн хэрэглээг хянах дөрвөн шалтгааныг онцолж байна.

Хэл ярианы хөгжил

Торонтогийн их сургуулийн мэргэжилтнүүдийн үзэж буйгаар хүүхдийн хэл яриа хөгжиж эхлэх үед ухаалаг төхөөрөмж хэрэглэх нь сөргөөр нөлөөлдөг байна. Зургаан сартайгаас хоёр хүртэлх насны 900 хүүхдийг хамарсан судалгааны дүнд өдөрт дор хаяж 1.5 цаг ухаалаг төхөөрөмж хэрэглэдэг бол хэлд удаан орох магадлал өндөр аж.

Илүүдэл жин

Ухаалаг төхөөрөмжийг олон цагаар хэрэглэдэг хүүхдүүд хөдөлгөөний дутагдалд орох, ингэснээр илүүдэл жинтэй болох магадлалтай. Интернэт, олон нийтийн сүлжээнд цагийг их өнгөрүүлэх үед хүүхдийн хоолны дуршил нэмэгдэх, нэг дор их хэмжээгээр идэх нь олширдог.

Сэтгэл зүйн хамаарал

Видео тоглоом, цахим орчин дахь зохисгүй агуулга бүхий бүтээлүүд хүүхдийн сэтгэл зүйд сөргөөр нөлөөлдөг. Мөн олон цагаар кино, нэвтрүүлэг үзэх, тоглоом тоглох нь хүүхдийн тархинд нөлөөлж, донтуулдаг. Тоглоом, дэлгэцэнд донтсон хүүхдэд сэтгэл зүйн хамааралтай бүх л хүний адил түгших, цочир уурлах, өөрийгөө хянаж чадахгүй байх зэрэг шинж тэмдэг илэрнэ. Улмаар хүмүүсээс өөрийгөө тусгаарлах, үл ойлголцох, эцэг эх, асран хамгаалагчтайгаа зөрөх, маргалдах зэрэг харилцааны олон асуудал үүсэх магадлалтай.

Нойргүйдэл

Дэлгэц олон цагаар ширтэх нь хүүхдийн нойронд нөлөөлдөг. Дэлгэцийн цэнхэр туяа хүүхдийн тархинд нөлөөлж, нойр хулжааж, бөх нойрсоход саад болж байдаг. Нойронд ийнхүү өөрчлөлт орох хүүхдийн анхаарал төвлөрөх, ой тогтоолтод сөргөөр нөлөөлдөгийг эрдэмтэд анхааруулж буй.

Тиймээс хүүхдийнхээ ухаалаг төхөөрөмжийн хэрэглээг хатуу хянах, хэрэглэх хугацааг өдөрт 1-2 цагт барих, гар утас, таблет хэрэглэх өөрсдийн дүрэмтэй болж, түүнийгээ мөрдөхийг санал болгож байна.

Эх сурвалж: American Academy of Pediatrics

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet