ДЭЛХИЙН МЭДЭЭ

Камбож: Хөл хорионы дэглэм зөрчсөн, коронавирус санаатай халдаасан хүнийг хорино

Коронавирусийн халдварыг дарах, иргэдийн аюулгүй байдлыг хангах үүднээс Камбож Улсын парламент нэгэн шинэ хуулийг дэмжин баталлаа. Хуулийн дагуу хөл хорионы дэглэмийг санаатайгаар зөрсөн, коронавирусийн халдварыг зориуд хүнд тараасан тохиолдолд хорих ял оноохоор болж байна.

Тодруулбал, хөл хорио, тусгаарлалтын дэглэмийг санаатайгаар зөрчсөн бол гурван жил, коронавирус болон бусад ноцтой халдварт өвчин санаатайгаар тараасан бол 20 хүртэлх жилийн хорих ял онооно. Энэ хуулийн талаар Эрүүл мэндийн сайд Мам Бунхенг иргэдийнхээ амь нас, эрүүл мэндийг хамгаалах хууль, эрх зүйн үндэс суурийг бий болгож байна гэж мэдэгдсэн байна.

Гэхдээ хүний эрхийн төлөө тэмцэгчид үүнийг арай өөрөөр харж буй. Тухайлбал, “Human Rights Watch” байгууллага энэ хуулийг сөрөг хүчнийхэн, өөр үзэл бодлыг баримтлагчдыг залхаан цээрлүүлэх зэрэг улс төрийн зорилгоор  ашиглаж болзошгүйг анхааруулав. Камбожийн засгийн эрхийг 36 жилийн турш барьж буй Ерөнхий сайд Хун Сенийг сөрөг хүчнийхнийг хавчин хяхаж, эрх баригчдыг эсэргүүцсэн хүмүүст олон жилийн хорих ял оноож нухчин дардаг гэж шүүмжлэх нь олонтаа.

Эх сурвалж: Newsru

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet