ДЭЛХИЙН МЭДЭЭ

Ядуурлыг ялсан дөрвөн арга

БНХАУ сүүлийн 40 жилийн хугацаанд ядууралтай тэмцэж, ялалт байгуулсныг тус улсын дарга Ши Жиньпин өнгөрсөн долоо хоногт албан ёсоор зарлалаа. Сүүлийн найман жилийн хугацаанд гэхэд 100 сая хүнийг ядуурлаас гаргаснаа тэрбээр энэ ташрамд онцолж байв. Ши Жиньпиний хэлж буйгаар, орон нутгийн хэмжээнд газар авсан нэн ядуу байдал устахад Коммунист намын авч хэрэгжүүлсэн арга хэмжээ, нийт ард түмний зүтгэл том хувь нэмрээ оруулжээ.

Өнгөрсөн найман жилийн хугацаанд Бээжин хөдөө нутгийн  98.9 сая оршин суугч буюу 832 тойрог, 128 тосгоныг ядуурлаас гаргахад 246 тэрбум ам.доллартай тэнцэх хэмжээний хөрөнгө зарцуулсан аж. 1970-аад оноос хойш 770 сая хүнийг ядуурлаас гаргасан байна. Ийнхүү ядуурлыг үгүй болгоход хамгийн их нөлөөлсөн дөрвөн хүчин зүйлийг шинжээчид  онцолж байна.

Нэгдүгээрт, БНХАУ ядууралтай үе шаттайгаар, урт хугацаанд тэмцсэн. Хамгийн алслагдсан, ядуу иргэн олонтой, дэд бүтцийн хувьд хөгжил сул өмнөд, баруун умард мужуудад хөрөнгө хаяж, оршин суугчдын амьжиргааг дээшлүүлэх, тогтмол орлоготой болгох, эрүүл, аюулгүй аж төрөх нөхцөл бүрдүүлэхийг зорьсон нь үр дүнгээ өгсөн гэж ажиглагчид үзэж байна.

Хоёрдугаарт, хүн амын тодорхой давхарга, бизнесийн салбарт татварын хөнгөлөлт үзүүлсэн. Тухайлбал,  цалингийн доод хэмжээг 5000 юаниар тогтоон, ийм болон үүнээс доош цалинтай иргэдэд татвар ногдуулахгүй байх арга хэмжээ авчээ. Бага цалинтай иргэд дунджаар 10-12 сарын дараа буюу нийт авсан цалингийнх нь хэмжээ  50 мянган юаньд хүрсний дараа татвар төлж эхэлдэг бөгөөд  орон нутагт ядуурлыг бууруулахад төдийгүй орлоготой дундаж давхаргыг бий болгоход том нөлөө үзүүлсэн аж. Мөн орон нутгийн хөгжилд хувь нэмрээ оруулах бага, дунд үйлдвэрлэл, бизнесийг татвараас чөлөөлж хөнгөлөн, улсаас дэмжих арга хэмжээ авч, зээл олгох үйл явцыг илүү амар болгосон.

Ядуурлыг ялахад бас нэг чухал үүрэг гүйцэтгэсэн хүчин зүйл нь социалист систем. Орлогын асар их зөрүү, үүнийг дагасан тэгш бус байдал үүсэхгүй тогтолцоог бий болгож, авлигатай хатуу тэмцсэн нь үр дүнгээ өгч байна гэж мэргэжилтнүүд үзэж байгаа юм. Мөн корпорациуд, томоохон компаниудаас орж ирж буй их хэмжээний орлогыг алслагдсан бүс, мужийн дэд бүтэц, зам харилцаа, технологийг хөгжүүлэхэд зарцуулж, эмнэлэг, сургууль барих зэрэг орон нутгийн хөгжилд онцгой үүрэг гүйцэтгэхэд зарцуулсан байна.

БНХАУ-ын иргэдийг ядуурлаас гаргахад чиглэсэн бас нэгэн томоохон бодлого хэрэгжүүлсэн нь үр ашигтай үйлдвэрлэлийг хөгжүүлэхэд анхаарсан. Оршин суугчид нь үе дамжин мал аж ахуй, газар тариалан эрхэлдэг хөдөөд аж үйлдвэрлэл, худалдаа, бизнесийг хөгжүүлснээр амьдралын өртөг буурч, орлого нь нэмэгдсэн байна. Мөн дэд бүтцийн хөгжил даган төрөл бүрийн үйлчилгээ, технологи нэвтэрсэн нь олон хүнийг ажлын байртай болгосон гэж судлаачид онцолж буй.

Эх сурвалж: Синьхуа, ВВС, МК, South China Morning Post

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet