ДЭЛХИЙН МЭДЭЭ

Капитолын үймээнийг шалгах хараат бус комисс байгуулна

Өнгөрсөн нэгдүгээр сарын 6-нд Капитолын ордон руу дайран үймээн дэгдээсэн хэргийг мөрдөн шалгах хараат бус комисс байгуулахаа АНУ-ын Конгрессын Төлөөлөгчдийн танхимын тэргүүн Нэнси Пелоси мэдэгдлээ. Үймээн чухам юунаас эхэлж, хэрхэн өрнөснийг тодруулж, үнэн мөнийг тогтоохын тулд комисс байгуулан 2001 оны есдүгээр 11-ний халдлагын дараа хэрхэн ажилласнаас үлгэр жишээ аван шалгах нь зүйтэйг спикер онцолжээ. Таван хүний амь эрсэдсэн энэ үймээнийг мөрдөн шалгах комисс байгуулах саналыг Конгрессын гишүүд ч дэмжиж буйгаа илэрхийлсэн байна.

Тус комисс Капитолын ордон руу дайрсан шалтгаанаас гадна мөн үеэр ажилласан аюулгүй байдлын алба болон хууль сахиулагчдын авсан арга хэмжээг тодруулан шалгах аж. Ташрамд, үймээний дараа Капитолын ордны аюулгүй байдлын системийг генерал Рассел Оноре хариуцах болсон юм. Үүний зэрэгцээ Капитолын ордон, Конгрессын гишүүдийн аюулгүй байдлыг хамгаалахын тулд нэмэлт санхүүжилт гаргах шаардлагатайг Нэнси Пелоси мөн мэдэгдсэн.

Нэгдүгээр сарын үймээний өмнө хүмүүсийг өдөөн хатгаж, турхирсан хэмээн Төрийн тэргүүн асан Дональд Трампт импичмент зарлах санал хураалтад шаардлагатай саналын тоо хүрээгүй учир хариуцлага тооцохоо больсон билээ.

Эх сурвалж: ВВС

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet