ДЭЛХИЙН МЭДЭЭ

СУДАЛГАА: II дайныг тойрсон шинэ мэдээлэл

Дэлхийн II дайнд хэдэн хүн амиа алдсаныг ХБНГУ-ын “Die Welt” онцолжээ. Дайнд оролцогч гол хоёр тал болох Зөвлөлт, Германы хохирлыг л түлхүү ярьж, тооцоолж ирсэнээс чухамдаа  амиа алдсан хүний тоо стастистикт мэдээлснээр хавьгүй их байх магадлалтай.

Судлаачдын тооцоолол, стастистик, түүхэн баримт сэлтээс үзвэл 55 сая орчим хүн амь үрэгдэж, бүхэл бүтэн хоёр үе үгүй болжээ.

Германы статистикийн тоогоор, нэг минут тутамд 1.7 герман цэрэг, цагт 105, өдөрт 2.5 мянган хүн нас барсан бөгөөд ийм гаслан, хагацал, аймшгаар дүүрэн 2077 өдөр өнгөрсөн. Гэхдээ энэ тоонд итгэх бас учир дутагдалтай. III Рейхийн цэргүүд бол дайнд амь үрэгдсэн хүмүүсийн цөөн хувийг бүрдүүлнэ. Үнэн хэрэгтээ дайны үед минут тутамд 19 хүн үрэгдэж байсан гэж үзэх судлаачид бий.

Түүхч, Дэлхийн II дайныг судлаач Рюдигер Офермансын онцолж буйгаар,  1901-1930 онд төрсөн гурван герман эрийн нэг нь буюу 28 хувь нь энэ дайнд амь үрэгджээ. Насны хувьд авч үзвэл, амь үрэгдэгсдийн дийлэнх нь 1919-1920 онд төрсөн, цэл залуу эрчүүд байв.

ЗХУ-ын хувьд дайнд амь үрэгдсэн хүмүүсийн тоо 17.5 саяас 40 саяын хооронд гэж тооцдог ч одоогоор 23-27 сая гэж албан ёсоор ярьдаг. Амь үрэгдэгсдийн тал нь цэргүүд.Улаан армийн 5.7 сая цэрэг нацистуудад олзлогдсоны 3.3 сая нь дайн дуусахыг үзэж чадалгүй амиа алджээ. Зөвлөлтийн энгийн иргэд ч олноороо нас барсан бөгөөд энэ талаарх тоо баримт бас л асар зөрүүтэй, долоон саяас 20 орчим саяын хооронд хэлбэлздэг.

Дэлхийн II дайны үед хятадууд ч чамгүй хохирол амссан. 1937 оноос үргэлжилсэн энэ дайны хажуугаар коммунист Мао Зэдун, коммунизмыг эсэргүүцэгч, генерал Чан Кайши болон Хятадын томоохон мужуудыг хяналтдаа байлгасан цэргийн захирагч нарын хоорондын зөрчлөөс үүдсэн иргэний дайны улмаас сая сая хүн амиа алдаж байжээ.

Харин Польш Улсын хувьд 6.028 сая иргэнээ алдсан гэдэг ч сүүлийн үеийн судалгаануудад энэ тоог 5.65 сая гэж онцлох болов. Тэдний гурван сая нь Польшийн иргэншилтэй еврей иргэд байсан бол Холокостын золиос болсон бүх хүний бараг тал нь юм.

Эх сурвалж: Die Welt

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet