LIFE STYLE

Минималист тохижилт хийх ЕСӨН зөвлөмж

Судалгаагаар  хүмүүсийн 75% нь ажлаа тараад  гэртээ ирэх үедээ стресстэй байдаг байна. Мэдрэл судлалын эксперт Эва Эдельштейн өрөөний тохижилт  нь тархинд нөлөөлж, стрессийг нэмэгдүүлэх эсвэл буруулах нөлөөтэйг баталсан. Гэр эмх цэгцгүй байх үед хүний уураг тархи “АЖИЛ ДУУСААГҮЙ” гэсэн дохиог өгч тайвшрах биш харин стрессийг үүсгэх, анхаарал төвлөрөлтийг алдагдуулах сөрөг нөлөөтэй ба интерьерийн экспертүүд өрөөг Минималист байдлаар тохижуулахыг хэрэглэгчдэдээ зөвлөдөг. Тэгвэл танд Минималист байдлаар өрөөгөө хэрхэн тохижуулах талаар экспертүүдийн есөн зөвлөгөөг хүргэж байна. Үүний өмнө танд Минималист тохижилтын талаар ойлголт өгье.

Та өрөө бүрийнхээ тавилга,  тавиур, ханан дээрх эд зүйлсээ анхааралтай ажиглаарай. Тэнд байгаа зүйлс үнэхээр байх шаардлагатай юу? Тэдгээрийг далд газар хадгалж болох уу? Минимализм бол яг энэ юм. Та энэ асуултыг өөртөө асуусан цагаас л эхлэн дассан орчинд тань эмх цэгц алдагдуулж буй зүйлсийг анзаарах болно. Гэрийг минималист харагдуулахад орон зай, гэрэлтүүлэг, гэрийн тавилга болон эд зүйлс чухал үүрэг гүйцэтгэдэг. Минималист хэв маяг нь өөрийн болоод гэр бүлийн хэрэгцээнд амин чухал шаардлагатай тавилга, эд зүйлсийг үлдээж бусдыг нь далд хийх юм. Та энэ үед гэрээсээ илүү шинэлэг, амар тайван стрессгүй мэдрэмжийг авах болно.

1.Өрөөндөө цөөн өнгө ашигла

Минималист хэв шинжид зайлшгүй байх эд зүйлсийн өнгө нь цагаан, саарал цайвар өнгө байдаг. Хэрэв илүү хурц тод өнгөтэй зүйл худалдан авах бол 3-4 өнгөөр хязгаарла. Доорх зурагт гэрэлтүүлэг сайтай өрөөг бий болгохын тулд цонхны хажууд цагаан гантиган ширээ, цайвар саарал сандлуудыг тавьсан байна.

2. Эд зүйлсээ цэгцэл

Минималист гэртэй болно гэдэг нь эмх замбараагүй байдалтай салах ёс гүйцэтгэх хэрэгтэй гэсэн үг юм. Үүнийг хийхийн тулд та тавиур, ширээн дээрх зүйлсээ цэгцэлж, далд хийх хэрэгтэй. Зөвхөн зайлшгүй шаардлагатай зүйлсээ үлдээж, үлдсэнийг нь шүүгээндээ хадгалаарай. Доорх зурагт гал тогооны цагаан тавилга дээр цөөн эд зүйлс байршуулсан нь өрөөг илүү загварлаг, орон зайтай болгож өгч байна.

3. Цөөн эд зүйлс байршуулж хоосон орон зайг бий болго

Өрөөн дэх эд зүйлсийг хоорондоо уялдаатай, хоосон орон зайг аль болох их бий болгохоор зохион байгуулах нь минималист хэв маягт чухал. Хүн харааныхаа тэнцвэрт байдлыг хадгалахын тулд үргэлж анхаарлаа төвлөрүүлэх шаардлагатай болж амархан ядардаг. Экспертүүд зочны өрөөндөө  анхаарал сарниулах олон эд зүйлс тавихгүй байхыг зөвлөдөг. Жишээ нь ханандаа гэр бүлийн зураг, шагнал, дурсгал гэх мэт олон чимэглэл зүйлсийг тавих нь ханыг эрээлжилсэн харагдуулдаг.

4. Харааны нэг чиглэлд цөөн тооны урлагийн бүтээл байршуул

Минималист орчинг бүрдүүлэхэд  чимэглэл болоод тод өнгөнөөс үргэлж зайлсхийх хэрэгтэй гэсэн үг биш юм. Дүрэм бол гоёл чимэглэлийн элементүүдийг зүгээр л өрөөндөө гоо зүйн орчинг бүрдүүлэхэд  ашиглаж, өрөөгөө олон зүйлээр дарахгүй байх явдал юм. Үүний нэгэн адил олон тооны жижиг урлагийн бүтээл тарааж байршуулахын оронд цөөн тоогоор нэг цэгт  фокуслох боломжтой байршилд тавиарай. Жишээ нь  зочны өрөөний ханан дээр байрлуулсан хөрөг зураг нь харааны нэг чиглэлд төв цэг болж байна.

5. Тэгш гадаргуу 

​Минималист өрөөний тавилга нь тэгш шугам, тэгш гадаргуутай байх нь чухал. Энэ гал тогооны шүүгээ болон цонх нь бариулгүй, тэгш гадаргуутай байгаа нь харсан хүн бүрийн нүдийг тайвшруулж буйг анзаарах болно.

6. Зарим тохиолдолд эд зүйлсийнхээ өнгийг холь

Унтлагын өрөөг дан цагаан, цайвар саарал өнгөтэй зүйлсээр тохижуулах нь хэт хоосон мэдрэмжийг өгдөг. Иймд олон өнгийн зүйлсийг тэнцвэртэй байршуулж өрөөг загварлаг, дулаан харагдуулах нь чухал. Доорх унтлагын өрөөнд шугаман хээтэй цайвар ногоон ханын цаас, цэнхэр  хөшиг, бор сандал тавьсан нь цагаан хана, ор, шүүгээтэй гойд зохицсон байна.

7. Цэлгэр цонх бол таны найз

Хэрэв та цонхондоо халхлах зүйлгүйгээр байгалийн гэрэл сайн оруулж байгаа бол минималист хэв маягийг үлэмж хэмжээгээр нэмэх болно. Хувийн нууцтай холбоотой асуудал байгаа бол нимгэн хөшигний материалыг ашиглах эсвэл наалт ашиглах хэрэгтэй. Энэхүү зочны өрөөнд нимгэн хөшиг нь нарны гэрлийг сайн оруулж өрөөний эд зүйлсийг өнгийг илүү тодотгож байгааг харж байна. Мөн ягаан өнгийг бага зэрэг оруулах нь  өрөөний гоо зүйг нэмэгдүүлдэг. Гэхдээ их хэмжээгээр биш.

8. Энгийн зүйлсийн хүч

Өрөөг минималист байдлаар чимэглэх нь ямар өнгийн, юугаар тохижуулах гэх мэт олон бодолд таныг дарж магадгүй. Хамгийн энгийн шийдэл нь цагаан дэвсгэр өнгөтэй хана, буйдан, ширээн дээр өөр өнгийн дэр, зураг, эдлэлийг цөөн тоогоор тавьдаг. Доорх зурагт цагаан өнгө нь эд зүйлсийг илүү тодотгож өгөхөөс гадна нүдийг амрааж  байна.

9. Тэгш хэмт хээ

Минималист тохижилтод хээтэй эдлэлийг бага ашиглах эсвэл бүр байлгадаггүй. Учир нь хүний тархи хээ харах үед логик уялдаа холбоог нь олох гэж ажиллаж эхэлдэг тул амархан ядарч, стресстдэг. Хэрэв та хээтэй дэр, ширдэг, орны бүтээлэг авахаар шийдсэн бол тэгш хэмт, урлаг гоо зүйн хээтэйг  сонгох нь зүйтэй.

Эх сурвалж: Gerlug Vista

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet