ДЭЛХИЙН МЭДЭЭ

Хамгийн залуу ЕРӨНХИЙ САЙД нар

“Хүйтэн дайн” дуусаж, ЗХУ-ын задрал дуншиж, Холливудад блокбастеруудын эрин ид цэцэглэж байсан 1980-аад онд өнөөгийн дэлхийн улс төр, эдийн засаг, нийгмийн амьдралд цоо шинэ уур амьсгалыг авчирч буй шинэ залуу удирдагчид хорвоод мэндэлж байв. Ази, Европ, Ойрхи Дорнод, Скандинавт өдгөө 30, 40 насны манлайлагчдын эрин эхэлж, тэдний зарим нь Засгийн газар толгойлж эхэллээ. Хамгийн залуу Ерөнхий сайд нарыг бид онцолж байна.

Санна Марин  \Финляндын Ерөнхий сайд\

Дэлхийн хамгийн залуу Ерөнхий сайд Санна Марин 27 настайдаа улс төрийн замналаа эхэлсэн. Санна Мирелла Марин Финляндын нийслэл Хельсинкид 1985 онд төрсөн бөгөөд Тампере хотын их сургуулийг 2012 онд захиргаа, удирдлагын чиглэлээр төгссөн юм. Анх 27 насандаа тус хотын Иргэдийн төлөөлөгчдийн хурлын даргаар сонгогдож, улмаар 2014 оноос Социал ардчилсан намын даргын хоёрдугаар орлогчоор ажиллаж,  2015 онд Парламентын гишүүн болж, 2019 оны зургадугаар сараас Зам тээврийг сайдын албан тушаалыг хашиж эхэлсэн билээ.

2019 оны зургадугаар сараас Засгийн эрхийг барьсан Социал ардчилсан намын тэргүүн Антти Ринне 2015 оноос Парламентыг тэргүүлсэн Финландын төв намын Юху Сипилягийн халааг авч байлаа. Олон жил төрийн алба хашсан туршлагатай улстөрч Антти Ринне орон даяар өрнөсөн ажил хаялтын улмаас судлаасаа бууж, парламент 34 настай Санна Мариныг сонгосон билээ.

Жасинда Ардерн /Шинэ Зеландын Ерөнхий сайд/

Шинэ Зеландын Лейборист намын дарга Жасинда Кейт Лорелл Ардерн  1980 онд төрсөн бөгөөд Финляндын шинэ Ерөнхий сайдаас өмнөх хамгийн залуу, эмэгтэй Ерөнхий сайд байлаа. 2017 оноос Шинэ Зеландын Засгийн газрын тэргүүний албыг хашиж буй тэрбээр 2008 онд анх бүх нийтийн сонгуульд намын жагсаалтаар нэр дэвшиж, 2017 оноос Маунт-Альбертын тойргийг Парламентад төлөөлж эхэлсэн.

Христийн шашны мормон урсгалыг дагагч, цагдаагийн гэр бүлд төрсөн тэрбээр лейбористуудыг дэмжигч, улс төрийн идэвхтэн нагац эгчийгээ шахалтаар анх энэ ертөнцөд хөл тавьсан гэдэг. Уаикатогийн их сургуулийг улс төрийн харилцаа мэргэжлээр төгссөнийхөө дараа Парламентын гишүүн Фил Гоффын багт орж ажиллан, улмаар  Ерөнхий сайд Хелен Кларкийн Тамгын газарт зүтгэж эхэлсэн аж. 

Хувийн амьдрал, царай төрхтэй нь холбоотой олон дайралт, шүүмжлэлийг үл тоон, сонгуулийн сурталчилгааны ажлаа явуулж, 12 жилийн турш өрсөлдөгч нь байсан Үндэсний намыг нэр хүндээрээ давж гарсныг улс төр судлаач, ажиглагчид “Жасиндагийн нөлөөлөл” хэмээн тухайн үед онцолж байлаа. Лейборист намын сонгуулийн кампанит ажилдаа зориулан явуулсан хандив, хөрөнгө татах аян өмнө байгаагүйгээр амжилт олж, улмаар ялалт байгуулснаар 37 настай залуу улс төрч Жасинда  Засгийн эрхэнд гарсан билээ.

Себастьян Курц  \Австрийн Холбооны Канцлер\

Инженер, багшийн гэр бүлээс гаралтай Себастьян Курц Венийн их сургуулийг хуульч мэргэжлээр төгссөн. Австрийн Ардын намын залуучуудын эвлэлд 17 настайдаа элсэн орж, 23 настай Венийн хороог тэргүүлсэн тэрбээр 2010-2011 онд Вена хотын зөвлөлд сонгогдон ажиллажээ.

2013 онд Курц Австрийн Гадаад хэргийн сайдаар томилогдсон бөгөөд улсынхаа түүхэн дэх хамгийн залуу сайд, Европын холбооны хэмжээнд хамгийн залуу Гадаад хэргийн сайд болж байв. 2017 оны аравдугаар сард болсон парламентны ээлжит бус сонгуульд Курцын тэргүүлсэн Ардын нам ялалт байгуулж, тэрбээр Холбооны Канцлерын албыг хашиж,  тухайн үедээ дэлхийн хамгийн залуу Ерөнхий сайд болжээ. 2019 оны есдүгээр сард болсон парламентын сонгуульд мөн л түүний нам ялалт байгуулж, 2020 оны нэгдүгээр сараас Себастьян Курц хоёр дахь удаагаа Канцлер болсон билээ.

Ташрамд, тэрбээр Австрийн түүхэн дэх хамгийн залуу Канцлер, энэ албыг анх хаших үедээ дэлхийн хэмжээнд хамгийн залуу Ерөнхий сайд, хоёр дахь удаагаа Засгийн газрыг тэргүүлж буй хамгийн залуу удирдагч юм.

Хавьер Эспот Самора \Андоррагийн Ерөнхий сайд\

Хавьер Эспот Самора Андорра Улсын Ерөнхий сайдын албыг 2019 оны тавдугаар сараас хашиж буй. 1979 онд Эскальдес-Энгордань хотод төрсөн тэрбээр эрхзүйн чиглэлээр магистр зэрэг хамгаалсан, Барселоны  Рамон Луллийн их сургуулийг Философийн танхимд хүмүүнлэгийн чиглэлээр суралцсан.

Одоогоос есөн жилийн тэртээ Дотоод хэрэг, нийгэм, хууль зүйн сайдаар томилогдон ажиллаж, 2019 оны парламентын сонгуульд түүний тэргүүлсэн Андоррагийн төлөөх ардчилсан нам ялалт байгуулснаар Ерөнхий сайд болжээ.

Ташрамд, түүний аав Ксавьер Эспот Миро ч улстөрч байсан бөгөөд Аялал жуулчлал, спортын сайд, Гадаад хэргийн сайдын албыг хашиж байсан нэгэн билээ.

Л.Оюун-Эрдэнэ \Монгол Улсын Ерөнхий сайд\

УИХ-ын чуулганы нэгдсэн хуралдаанаар Монгол Улсын Ерөнхий сайдыг томилох асуудлыг хэлэлцэж, Лувсаннамсрайн Оюун-Эрдэнийг 32 дахь Ерөнхий сайдаар томиллоо. Санал хураалтад оролцсон 66 гишүүнээс 58 гишүүн дэмжиж 87.9 хувийн саналаар ийнхүү шинэ Ерөнхий сайдыг томилов.

Тэрбээр Монгол Улсын түүхэн дэх хамгийн залуу Ерөнхий сайд болж байгаа бөгөөд 1998 онд Хэнтий аймгийн Бэрх хотын Ерөнхий боловсролын сургууль, 2001 онд Бэрс дээд сургуулийг төгсөж, 2008 онд Монгол Улсын их сургуулийн Хууль зүйн сургууль, 2001-2002 онд Хэнтий аймгийн Бэрх хотын Захирагчийн ажлын албанд Тамгын газрын дарга, 2002-2007 онд “Дэлхийн Зөн Монгол” Олон улсын байгууллагын бүсийн захирал, 2008-2010 онд Монгол Ардын Намын Удирдах Зөвлөлийн Хэрэг эрхлэх газрын дарга, 2010-2015 онд Нийгмийн Ардчилал Монголын Залуучуудын холбооны ерөнхийлөгч, 2011-2012 онд Монгол Ардын Намын Нарийн бичгийн дарга, 2012 онд Монгол Ардын,  Намын Ерөнхий нарийн бичгийн даргын үүрэг гүйцэтгэгч, 2016 оноос одоог хүртэл Монгол Улсын Их Хурлын гишүүн, 2019-2020 онд Монгол Улсын сайд, Засгийн газрын Хэрэг эрхлэх газрын даргын албыг тус тус хашиж байжээ.

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet