ДЭЛХИЙН МЭДЭЭ

Төлөөлөгчдийн танхим импичментийг дэмжлээ

АНУ-ын Ерөнхийлөгч Дональд Трампт хуулийн хариуцлага тооцох саналыг Конгрессын доод танхим буюу Төлөөлөгчдийн танхим хэлэлцэж, дэмжлээ. Саналыг тус танхимын 232 гишүүн дэмжиж, 197 гишүүн татгалзсан бол дэмжигчдийн дунд Бүгд найрамдах намын 10 гишүүн байв. АНУ-ын эрх барих байгууллагын аюулгүй байдалд заналхийлсэн, үймээнд турхирсан хэмээн Дональд Трампыг эргүүлэн татаж, хариуцлага тооцох саналыг одоо Конгрессын дээд танхим буюу Сенат хэлэлцэх үлдээд байгаа юм.

Төлөөлөгчдийн танхимд импичментийн асуудлаар санал хураахын өмнө гишүүд чамгүй удаан мэтгэлцсэн бөгөөд спикер, Ардчилсан намын гишүүн Нэнси Пелоси Ерөнхийлөгч Д.Трампын үйлдлийг маш халтай гэж үзэж буйгаа онцолжээ. Түүнээс гадна импичмент бол ард түмний хувьд үнэ цэнтэй зүйлийг үгүй хийхээр заналхийлж буй хүнээс улс орноо аврах хууль ёсны үйл явц гэж тэрбээр мэдэгдсэн байна. Мөн Ардчилсан намын гишүүд Д.Трампыг өөрөө огцрохыг шаардах, үгүй бол Үндсэн хуулийн 25-дахь нэмэлт өөрчлөлтөд зааснаар огцруулах арга хэмжээг авах нь зүй гэж үзэж байгаа юм.

Импичментийн саналыг Сенат руу илгээж байгаа бөгөөд энэ сарын 20-нд буюу Дональд Трампын бүрэн эрхийн хугацаа дуусахаас өмнө Конгрессын дээд танхим энэ асуудлыг хэлэлцэж амжихгүй байж магадгүй гэж ажиглагчид үзэж буй.

Эх сурвалж: ВВС

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet