6 сарын 7, Ням
ИРГЭНИЙ ӨНЦӨГ

Ой гутаж байна

Гэрэл зургийг MPA.mn

Анх-Отгон нэртэй ганц франц эрийг вирустай нь илэрмэгц манай нийгэм сүрхий доргиж билээ, саяхан даа. Одоо ч дөжирч байгаа бололтой. Өчигдөрхөн дөчин хэдээр нэмэгдсэн, өнөөдөр 37-оор нэмэгдээд, юун ганц Анх-Отгон, 135 болчихож. Гэтэл тоож байгаа ч юм алга, бүгдээрээ сонгуулиар өвчилчихсөн, нүд нь гялалзчихсан, өвчтэй эсэх нь мэдэгдэхгүй болцгоочихсон. Бурхан минь, эрүүл ухаан хайрлаач гэмээр болох…

Энэ халдварын тоо цаашид ч нэмэгдэнэ. Шинэ илрэлүүд бүгд гаднаас авчирч буй монголчуудаас юм. Тэгэхээр тэд маань ямар хүнд хэцүү нөхцөлд байгааг хэлнэ. Гадна буй монголчуудаас маань 10 000 орчим хүн ирэх хүсэлтээ тавьсан. Эх орон нь учраас өвчтэй эсэхээс, луйварчдын үр хүүхдүүд эсэхээс, Монголд вирус гарлаа гээд дайжаад Европ гарчихаад гацсан эсэхээс үл хамааран хэн ч байсан бүгдийг нь авчрах л ёстой. Төр яаралтай хийх хэрэгтэй.

Өвчтөн цөөдөөд байгаа юм биш ээ, гадна байгаа монголчуудаа цаг алдалгүй авчрах, авчраад тусгаарлаад ялгаад эмчлэх нь Төрийн үүрэг юм. Харин авчирсан хойно оо маш чанд хатуу хорио цээр, дэг журам хяналт байх учиртай. Тэнд сонгуульд зарцуулж байгаа хөрөнгөө зарцуулаасай. Эцсийн эцэст хүний амь л үнэтэй байдаг. Сонгууль чухал биш. Нэг ч болсон монгол хүнийхээ амийг авч үлдэхийн төлөө боломж бүхнийг ашиглах ёстой юм аа. Хүний газарт мөнгөгүй, орох ч оронгүй болж магадгүй монголчууд олон бий.

Гэтэл яасан яасан ч гэв, авчрахгүй байх талаар ЭМЯ хавиар яриа хөөрөө гарсан гэх мэт чимээ чих дэлдэх. Авчирчихвал өвчтөний тоо нэмэгдчихнэ, тэгээд нэмэгдчихээр өнөөх өөрсдөд нь ашигтай сонгуульд харш болчихно гэж үзээд гадаадад байгаа монголчуудаа авчрах дургүй байгаа юм биш үү гэсэн хардлага эрхгүй төрж байна. Худал л байгаасай.

Авчрах ажил удаашралтай байгааг харахаар магад ч үгүй гэсэн хар төрөх. Авчрах уу, үгүй гэдэг асуулт огт байхгүй. ГАГЦХҮҮ авчраад 10 000 хүнийг тодорхой хугацаагаар тусгаарлаад, хянаад, өвчтэй эсэхийг нь тодруулаад, ялгаад, эмчлээд гаргах ажлаа л сайн зохион байгуулах хэрэгтэй. Бэрхшээл энд л бий.

Нөхцөл байдал ийм байхад СОНГУУЛЬ ХИЙНЭ ГЭЖ ЧИЧРЭЭД БАЙХ шаардлага огт байхгүй юм, уг нь. Сонгууль хийхгүй байна гээд Улс орон сүйрчих гээд байгаа юм байхгүй. Харин тойргоо усалсан, одоо хөрөнгөө цацаад эхэлсэн улс төрчид л сүйрэх байх. Тиймээс л тэд чичрээд, тархи угаагаад, улайраад, лоббидоод байгаа хэрэг. Тэдний олонхи нь МАН-АН-ынхан. Эрх баригчид. Чоно борооноор гэдэг шиг энэ өвчин зовлон ашиглаж өөрсөддөө ашигтай нөхцөлд сонгуульдаж авах гэж улайрч байна. Түүнээс сонгуулиа хийхгүй бол бид үхлээ, хатлаа гэж тэмцэж буй нэг ч сонгогч байхгүй.

Сонгууль хугацаандаа болоход шинэ төр засаг гарч ирэх магадлал маш бага. Хүрэлсүхийн засаг л эргээд гарна. Тэгэхээр энэ вирусын эсрэг Төрийн бодлого ч, эндээс үүдэх ЭЗ-ийн хүндрэлийн талаарх Төрийн бодлого ч өөрчлөгдөхгүй. Одоо Хүүкийн ЗГ Төсвийн тодотгол хийхгүй л гэж гүрийчихээд байгаа шүү дээ. Нөгөө талаар Засаг солигдож, өөр хүчин, магадгүй эвслийн ГЗ гарч ирлээ гэхэд энэ Засаг солигдох үеийн үймээн бужигнаан тийм ч хүсэхээр юм бас л биш баймаар. Одоо байгаагаасаа дээрдэх хүчин гарч ирнэ гэсэн баталгаа бий юу?

“Ядарсан дээр яр” гэдэг шиг энэ хямралтай хэцүү үед сонгуульдана гэж улайрч чичрэх нь наана хэлэхэд эдийн засагт дарамт, цаашилбал энэ олон хүнийг стрессдүүлж, талцуулан хэрэлдүүлж бас сэтгэцийн гүн хямрал зөрчилд түлхэж байна. Дээр нь ингэж хийрхэж бужигнаж байгаад өвчнөө алдчихвал юу болох вэ? Хариуцлагыг нь хүлээж чадах эр зориг, шударга ёс зүй ЭНЭ УЛС ТӨРЧДӨД л лав байхгүй юмдаг. Хохирдгоороо ард түмэн бид хохироод үлдэнэ.
Уг нь 10 000 хүн авчраад эмчлээд гаргахад хангалттай хүрэлцэхээр их

хөрөнгийг сонгуулийн амлалт, бэлэг, сурталчилгаа нэртэй цаас, элдэв ПиАр, самбар, бас бензин шатахуун энэ тэр болгож сонгуульд цацах гэж байгаа биз дээ, цацаад л эхэлсэн шүү дээ. Ийм л сэтгэлгүй, хүйтэн, ухаангүй төртэйдээ, сайд, гишүүдтэйдээ, эрх баригчидтайдаа ой гутаж байна. Хүүхдийн хичээл сургалт хаачихсан атлаа сонгуульдана гээд байгаа нь ариун явдал уу?

Надтай санал нийлж буй хүмүүс цааш цааш нь түгээж, давалгаалуулаарай. Санаагаар болдог бол энэ сонгуулийг больчихмоор байна.

via Б.Номинчимэд / Naminchimed Baasan

Хариулах


ШИНЭ МЭДЭЭ

Дээш