ЯРИЛЦЛАГА

П.Мягмарсүрэн: Би, бид тэр хэмжээнд хүрч тоглож чадах болов уу

Өдгөөгөөс 13 жилийн өмнө “Хайрын виз” уянгын драмын жүжиг залуусын дунд хит болж байлаа. Жүжгийн зохиолыг соёлын гавьяат зүтгэлтэн, зохиолч, сэтгүүлч Ц.Балдорж агсан бичиж, төрийн соёрхолт, найруулагч Н.Наранбаатар найруулж байв.

“Хайрын виз”-ээр дахин аялаарай

Өдгөөгөөс 13 жилийн өмнө “Хайрын виз” уянгын драмын жүжиг залуусын дунд хит болж байлаа. Жүжгийн зохиолыг соёлын гавьяат зүтгэлтэн, зохиолч, сэтгүүлч Ц.Балдорж агсан бичиж, төрийн соёрхолт, найруулагч Н.Наранбаатар найруулж байв. Гол дүрд ардын жүжигчин Г.Мягмарнаран, жүжигчин Д.Ганцэцэг, Г.Амгаланбаатар, С.Болд-Эрдэнэ зэрэг авьяаслаг уран бүтээлчид тоглосон байдаг юм.

Хайр гэдэг наддаа гуниг ч юм уу

Хамгийн гэнэн алдаа ч юм уу

Бүрхэг шөнийн саран ч юм уу

Бүлээн нулимстай харц ч юм уу

Дурлал гэдэг наддаа учрал ч юм уу

Дурсамж дүүрэн өдрүүд минь

Зүрхэнд мандсан нарны цацраг шиг

Зүүдэнд ирсэн үлгэр ч юм уу… гэх жүжгийн дуу, клип радио, телевизийн хитийг тэргүүлж, шүлгийг нь бичсэн Р.Эмүжин найрагчийн зураг тэмдэглэлийн дэвтэрүүдийг чимж байсныг тодхон санаж байна. Тэгвэл “Хайрын виз”-ийг УДЭТ-ын уран бүтээлчид урын сангаасаа дахин гаргаж, энэ сарын 7-9-ний өдөр үзэгчдийн хүртээл болгохоор зэхжээ.

Шинэчилсэн жүжгийн гол дүр болох Сүндэрийн дүрийг бүтээсэн залуу жүжигчин П.Мягмарсүрэнтэй ярилцсанаа хүргэе.

-Өөрийн тань хувьд улсын Драмын эрдмийн театрт ороод тун удаагүй. Өөрөөр хэлбэл, залуу уран бүтээлчийн хувьд уншигчдад маань төдийлөн сайн танил болоогүй гэхэд болно. Иймд таны тухай яриагаа эхэлье.

-Би 2016 онд СУИС-ийн Хөгжимт театрын жүжигчний ангийг төгссөн. Төрийн соёрхолт, УДЭТ-ын ерөнхий найруулагч Н.Наранбаатар, соёлын тэргүүний ажилтан Ц.Батнайрамдал багшийн удирдлага дор суралцсан юм. Төгссөн даруйдаа мэргэжлээрээ ажилласангүй ээ, хоёр жил орчим хүүхдээ харж байгаад 2018 оны нэгдүгээр сард театрын студи ангийн элсэлтийн шалгалтад орж, тэнцсэн. Ажиллаад удаагүй болохоор туршлага дутах зүйл гарна. Зарим үед өөрийгөө голно. Гэхдээ маш их хичээж байгаа. Найруулагч болоод студи ангийнхаа, театрынхаа жүжигчдийн зааж зөвлөсөн, хэлж ярьснаас суралцаад л явна.

-Драмын театрын босго өндөр гэдэг. Та хэр бэлдсэн бэ?

-Манай театр уран бүтээлчдийн дунд хоёр жилд нэг удаа шалгалт авч, жүжигчдээ сонгодог.  Өөрөөр хэлбэл студи ангидаа цөөхөн хэдэн залуу уран бүтээлчид авдаг. Энэхүү шалгалтыг хүлээж байгаад өгсөн. Хэрэндээ хичээж бэлдсэн. Мэдээж босго өндөр байлгүй яах вэ.

-Студи анги гээд ярихаар уншигчдын зарим нь юу юм бол гэж бодох байх. Энэ ангийн тухай товчхон яриач?

-Студи ангийн жүжигчид маань театрт хоёр жилийн хугацаатай ажиллаж байгаад дахин шалгалт өгч байж жинхэлдэг. Драмын театрт орчихсон л бол жинхэнэ жүжигчин болчихлоо гэж бодож болохгүй. Шалгуур өндөртэй, шалгалт их авдаг, алхам тутамдаа суралцсаар байдаг.

-Тус ангид одоо хэчнээн залуу жүжигчид байна?

-Дөрөв. Хоёр эрэгтэй, хоёр эмэгтэй жүжигчин. Энэ удаагийн “Хайрын виз” жүжгийг залуу уран бүтээлчид дээрээ тулгуурлан тайзнаа тавьж байгаа. Дээр нь гавьяат жүжигчин Ц.Оюундарь, соёлын тэргүүний ажилтан н.Түвшинхүү, Г.Амгаланбаатар гээд мундаг жүжигчид багтсан.

-“Хайрын виз” уянгын драмын жүжиг өөрийн тань оролцон тоглож буй хоёр дахь бүтээл байх нь. Өмнө нь “Бүсгүйн зурвас” жүжигт дүр бүтээсэн байх аа?

-Дүр бүтээх гэхээсээ илүүтэй оролцсон гэж хэлж болно. Архай сайдын шинэ эхнэр буюу туслах роль дээр ажилласан.

-Үзэгчдэд цоо шинэ өнгө аясаар хүрэх “Хайрын виз” жүжигт гол дүр бүтээж байна. Жүжгийн хувьд 13 жилийн өмнө тоглогдож байсан бүтээл шүү дээ?

-Тийм ээ, 13 жилийн өмнө Н.Наранбаатар найруулагчийн найруулгаар тайзнаа гарч байсан. Харин одоо тэс өөр тавилтаар үзэгчдэд хүрнэ. Магадгүй үзэгчид 13 жилийн өмнөх найруулгаар нь хүлээлттэй байж болох юм. Гэхдээ энэ удаа шинэ жүжиг, шинэ дүр төрх, шинэ тавилт гэдгээрээ ихээхэн онцлог болсон. Найруулагчийн хувьд ОХУ-д мэргэжил эзэмшсэн Мягмарнарангийн Батболд гээд залуу бий. Будаг нь ханхалсан шинэхэн найруулагч.

Театрын хувьд урын сан дахь жүжгүүдээ дахин сэргээж тавьдаг. Өнгөрсөн жил буюу бидний өмнөх студи ангийнхан маань “Надаар тоглосон хайр” жүжгийг үзэгчдэд хүргэж байсан бол, энэ удаа манай ангийнхан “Хайрын виз” жүжгийг тоглох гэж байна.

-13 жилийн өмнөхөөс дүрүүдийн хувьд хэр өөрчлөлт орсон бэ?

-2006 онд үзэж байсан хүмүүс одоо үзвэл огт өөр Цэнгэл, огт өөр Жаргалыг олж харах болов уу. Бас “Аан, ийм Сүндэр байж болох юм байна шүү” гэж бодохоор болсон. Жүжгийн тавилт бол мэдээж өөр. 2006 онд нийгмийн байдал ямар байсан билээ. Тэр үед бичигдэж байсан зохиол шүү дээ. 13 жилийн хугацаанд өөрчлөгдсөн, өөрчлөгдөөгүй үлдсэн нь юу байгаа бол гэдгийг энэ удаагийн жүжгээс харж болно. Залуусын хайр дурлал, нийгмийн байдал, хүмүүсийн худал, хуурамч зан бидний оюун санаанд яаж нөлөөлж байна, жинхэнэ хайр мөнүү, биш үү гэх эргэлзээ… Хүний итгэл найдвар, хайр, нийгүүлсэл зэрэг нандин зан чанарууд хаачив, бид өөрөөрөө байж чадахгүй өөр хүн болчихсон, үүнийгээ өөрөө ч мэдэхгүй явж байгаа зэрэг сайнтай, муутай олон зүйлийг энэ жүжгээрээ хөндсөн. Иймд залуучууд маань ирж үзээсэй. “Би чинь хэн билээ” гэж өөрөөсөө нэг асуугаасай гэж бодож байна.

-Жүжгийн бэлтгэл хэр явж байна. Дүрдээ ороод тоглоход өөрийгөө чамлах тохиолдол гарах юм уу?

-Энэхүү жүжигт бидний үеийн залуучуудын тухай өгүүлдэг. Энэ нь дүрдээ орж тоглоход ойрхон тусч байгаа ч 13 жилийн өмнө маш мундаг жүжигчид олны хүртээл болгочихсон бүтээл. Ингээд бодохоор би, бид тэр хэмжээнд хүрч тоглож чадах болов уу гэсэн айдас байна. Тухайн үед энэхүү жүжгийн билет олдохгүй маш эрэлттэй, нийгмийг ч нэлээд шуугиулж байсан. Иймд залуу жүжигчид бид маш их хичээж байгаа.

-“Хайрын виз”-ийн 13 жилийн өмнөх үзэгчид энэ удаа ч ирэх болов уу гэж бодоод байгаа юм. Та нарт ч гэсэн ийм хүлээлт байгаа биз дээ?

-Үзэгчдийн маань дийлэнх хувь нь 2006 оны үзэгчид байх болов уу. Үүнд тун итгэлтэй байгаа. Олон жилийн өмнөх жүжиг одоо ямар болсон бол гэсэн хүлээлттэй үзэгчид олон байх байх.

-Өөрийн тань хувьд дэлгэцийн бүтээлд тоглож байв уу?

-Оюутан байхдаа туслах дүр бүтээж байсан. Мөн 2016 онд нээлтээ хийсэн “Хүн мод” кинонд гол дүр бүтээсэн.

-УДЭТ-ын хувьд цаашид ямар уран бүтээл дээр ажиллах төлөвлөгөөтэй байгаа бол?

-Хүүхдийн жүжгийн шалгаруулалт явуулж, Дорнод аймгийн театрын найруулагч н.Мөнх-Амьдрал түрүүлсэн. Удахгүй хүүхдийн жүжгийн сургуулилтандаа орох гэж байна. Мөн театрын залуу найруулагч н.Чингүүний залуучууд руу чиглэсэн шинэхэн жүжиг сургуулилтанд орно. Эхний ээлжинд “Хайрын виз” маань нээлтээ хийгээд дараа дараагийн сургуулилтуудаа хийгээд явна гэсэн үг л дээ. Харин намраас театр маань үзэгчидтэйгээ олон шинэ уран бүтээлээр уулзана.

-УДЭТ-ын уран бүтээлчид саяхан орон нутагт ажиллаад ирсэн. Явсан ажил хэр үр дүнтэй байв. Орон нутгийн үзэгчид хэр сэтгэгдэл үлдээв?

-Театрынхан маань хаврын бригад гээд Дорнод, Хэнтий, Төв аймагт очоод ирлээ. “Бардам туулай”, “Бүсгүйн зурвас”, “Би эндээс явахгүй”, “Тэнгэрийн хүү” жүжгээ тоглолоо. Үзэгчид маш сайхан хүлээж авсан. Очсон аймаг бүрийн театрын суудал дүүрсэн. Миний хувьд анх удаа бригадаар явсан тул орон нутгийн иргэд хэр ирдэг бол гэж бодож байлаа. Хүмүүс драмын жүжиг их үздэг болж, хөдөө орон нутагт гэлтгүй иргэд чөлөөт цагаа зөв боловсон өнгөрүүлэх тал дээр ихээхэн анхаардаг нь ажиглагдсан.

-Харж байхад орон нутгийн театрууд хэр идэвхтэй үйл ажиллагаа явуулж байна?

-Театрууд олон арван уран бүтээл дээр ажилладаг нь харагдсан. Энэ ч утгаараа манай театраас зарласан хүүхдийн жүжгийн уралдаанд Дорнодын театрын найруулагч шалгарсан болов уу.

-Монголын театрын урлагийн залгамж халаа болсон залуу уран бүтээлчийн хувьд урлагийн салбар дахь төрийн бодлого, шийдвэрийг хэрхэн харж, бодож, хүлээж явдаг юм бол?

-Театр гэлтгүй урлагийн салбар дахь төрийн бодлого чамлахаар байгааг үгүйсгэхгүй. Харин сүүлийн жилүүдэд бага багаар анхаарлаа хандуулж байна уу даа гэж харах болсон. Урлагийн байгууллагуудын барилгуудыг шинээр барьж эхэлж байна. Энэ мэт анхаарах болсонд баяртай байгаа.

Image may contain: 3 people, people sitting

-Сэдвээсээ жаахан хазайя. Гэр бүлээ танилцуулаач. Нөхөр тань бас жүжигчин байх аа?

-Тийм ээ, манай гэр бүлийн хүн жүжигчин мэргэжилтэй. Бид хоёр нэг анги төгссөн, ажил мэргэжлийг маань ойлгохгүйн зовлон байхгүй. Тэр ч утгаараа би санаа амар ажлаа хийгээд явдаг. Драмын театрын хувьд бэлтгэл сургуулилт их, олон цагаар ажиллана. Энэ бүхнийг минь ойлгоод ар гэртээ анхаарал халамж тавьдаг ханьдаа баярлаж явдаг шүү гэдгээ энэ завшааныг ашиглаад хэлье (инээв).

2 Comments

2 Comments

  1. A WordPress Commenter

    10th July 2019 at 7:07 am

    Hi, this is a comment.
    To get started with moderating, editing, and deleting comments, please visit the Comments screen in the dashboard.
    Commenter avatars come from Gravatar.

  2. byambaa

    11th July 2019 at 1:35 pm

    сайхан хос

Leave a Reply

Your email address will not be published. Required fields are marked *

Most Popular

To Top